Good Will Hunting (1998)

Good Will Hunting er ein af þessu feel good myndum (svo ég sletti nú aðeins). Hún lætur mann virkilega hugsa um þau atriði í lífinu sem gefa því gildi, og því ættu allir að sjá þessa mynd.

Í stuttu máli fjallar myndin um Will Hunting (Matt Damon)sem er ótrúlega gáfaður ungur drengur en á margt óleyst í sálarlífi sínu, og samskipti hans við sálfræðingin sinn sem Robin Williams leikur og kærustuna sína sem leikin er af Mini Driver.

Allur leikur í myndinni er til fyrirmyndar, og ég hef aldrei séð Robin Williams jafn góðan og í þessari mynd, hann er hreint út sagt frábær, og fékk hann verðskuldað óskarinn fyrir aukahlutverk karla árið 1997.

Matt Damon leikur hinn unga Will Hunting af mikilli prýði, og ná þeir félagar Matt og Robin að skapa virkilega sterkar persónur sem gaman er að fylgjast með.

Mini Driver er fín í sínu hlutverki og Ben Afleck, sem leikur besta vin Will, er alveg þrusugóður í sínu hlutverki og tvímælalaust hans besta frammistaða hingað til á hvíta tjaldinu.

Sérstaklega skal þó minnst á frammistöðu Stellan Skarsgård sem túlkar hinn ringlaða stærðfræðiprófesor af stakri prýði og stígur ekki feilspor alla myndina, sannarlega meistaraleikur.

Sagan sem þeir vinirnir Matt Damon og Ben Afleck skrifuðu er mjög svo áhugaverð og manni er alls ekki sama um persónurnar sem maður er að fylgjast með í myndinni, persónusköpunin er hreint frábær. Þeir vinirnir fengu óskarinn fyrir besta handritið árið 1997.

En gott handrit er ekkert ef það er ekki réttur maður fyrir aftan vélarnar, og það er toppmaður sem leikstýrir þessari mynd. Gus Van Sant sínir hér alla sínu bestu takta, og er það mikið honum að þakka hversu frábærlega til tókst. Tvímælalasut hans besta verk.

Ég mæli með þessari mynd fyrir bókstaflega alla, ég veit ekki um neinn sem mundi ekki hafa gagn og gaman á að sjá þetta meistaraverk. Tvímælalaust fjórar stjörnur.

Einhver frumlegasta best gerð í andlegum hætti og best leikna mynd áratugsins. Matt Damon, Robin Williams og Ben Affleck koma með hörkuleik. Myndin vann óskar fyrir besta upprunalega handrit og leik í aukahlutverki: Robin Williams.

Hugljúf, raunsæ og meistaralega vel gerð kvikmynd sem hlaut ótal verðlaun og viðurkenningar um allan heim, þar á meðal 9 óskarsverðlaunatilnefningar 1997, þ.á.m. sem besta kvikmynd ársins, fyrir leikstjórn og snilldarleik Matt Damon á aðalpersónunni en hún hlaut óskarinn hinsvegar fyrir besta frumsamda handritið og besta leikara í aukahlutverki (Robin Williams). Hér er sögð sagan af hinum unga og óútreiknanlega Will Hunting (Matt Damon). Segja má að í honum blundi algjörar andstæður. Annars vegar er hann heillandi persóna, gæddur snilligáfu, en hins vegar er hann upp á kant við allt og alla. Hann vinnur venjulega verkamannavinnu á milli þess sem hann slæst á kránni og lendir í útistöðum við lögregluna og einu kynnin sem hann hefur haft af framhaldsskólagöngu eru þau að hann hefur skúrað gólfin í háskóla heimabæjar síns. Þrátt fyrir það er hann ótrúlega vel að sér í sögu og getur einnig á augabragði leyst stærðfræðiþrautir sem vefjast jafnvel fyrir hámenntuðum prófessorum. En svo lendir þessi undarlegi ungi maður í enn einum slagsmálunum og nú er fyrirsjáanlegt að hann kemst ekki hjá fangelsisdómi. Eina vonin fyrir hann er að sálfræðingurinn Sean Maguire (Robin Williams), sem dáist af óvenjulegum hæfileikum hans, geti komið honum til bjargar og hjálpað honum að komast á beinu brautina. En mun það takast? Robin Williams hlaut óskarinn sem besti leikari í aukahlutverki 1997 fyrir stórfenglega túlkun sína á hinum úrræðagóða sálfræðingi, og átti hann það svo sannarlega skilið, rétt eins og Matt Damon verðskuldaði tilnefninguna í flokki bestu leikara í aðalhlutverki sama ár. Þeir eru báðir þrusugóðir í túlkun sinni. Meðal annarra aðalleikara myndarinnar er Minnie Driver sem er afar góð í hlutverki Skylar, unnustu Wills (hún hlaut enda tilnefningu til óskarsverðlauna sem besta leikkona í aukahlutverki) og þeir Ben Affleck og Stellan Skarsgård. Leikstjóri myndarinnar er hinn virti Gus Van Sant sem hefur að mínu mati aldrei tekist betur upp en í þessari mynd, enda hlaut hann tilnefningu sem besti leikstjóri ársins, fyrir vikið. Þess ber að geta fyrir þá sem ekki vissu það fyrir að það eru tveir af aðalleikurum myndarinnar, þeir Matt Damon og Ben Affleck sem eru handritshöfundar myndarinnar, og uppskáru fyrir það óskarinn fyrir besta frumsamda handrit ársins, þeir sömdu það vegna þess að þeim bauðst ekkert ákjósanlegt handrit og fengu enga stóra sénsa í bransanum. Síðan þessi mynd var gerð eru þeir með eftirsóttustu leikurum samtímans og hafa því náð að klifra upp metorðastigann í Hollywood svo um munar. Ekki slæm byrjun á ferlinum það fyrir þessa úrvalsleikara. Ég endurtek enn og aftur að þessi mynd er stórfengleg í alla staði og er hún hiklaust ein allra besta kvikmynd ársins 1997. Ég mæli því eindregið með henni við alla kvikmyndaunnendur og þá sem áhuga hafa á úrvalsmyndum

Sennilega ein besta ef ekki bara besta kvikmynd sem gerð var árið 1997. Ef þú hefur ekki séð þessa kvikmynd þá skaltu sjá hana næst. Handritið er alveg einstaklega gott, góðir leikarar og vægast sagt vönduð í alla staði.