Cast Away (2000)

Cast Away skipar sér í flokk bestu mynda ársins að mínu mati. Myndin hefur allt sem góð mynd þarf að prýða þ.e.a.s. gott handrit, góður leikur og góð kvikmyndastjórn. Myndin sýnir á mjög raunsæan hátt hvernig maður sem verður strandaglópur á eyðieyju bjargar sér. Atriðið þegar flugvélin ferst er magnað og maður fær gæsahúð því það er eins og maður sé staddur um borð í vélinni, feykilega vel unnið atriði. Tom Hanks sýnir afbragðs leik, enda lagði hann mikla orku í hlutverkið, nokkuð sem aðrar Hollywood stjörnur ættu að taka sér til fyrirmyndar. Aðrir leikarar eru prðýðilegir og þá sérstaklega Helen Hunt og hlýtur hún að verða tilnefnd til óskarsverðlauna fyrir aukahlutverk. Sem sagt góð skemmtunn og þeir sem halda öðru fram eru vitleysingar

Tom Hanks leikur hér hraðflutningamanninn Chuck Noland sem verður skipreka á eyðieyju eftir hræðilegt flugslys og dvelur þar næstu árin. Myndin er frekar róleg og innantóm en þrátt fyrir það er hún alls ekki sem verst. Tommi gamli heldur henni uppi með einleik sínum stóran huta myndarinnar og einu samtölin eru við blakbolta með andlit úr blóði. En þessi tveggja og hálfrar stjörnu mynd verður að teljast með síðri myndum Robert Zemeckis enda hefur hann aldrei gert lélega mynd.

Cast Away er um mann sem vinnur við að flytja póst á milli fylkja í Bandaríkjunum. Aðfangadagskvöld er hann fengin til að flytja póst og lendir þá í flugslysi ásamt öðrum starfsfélögum. Hann er sá eini sem kemst lífs af og lendir á eyðieyju og lifir þar í 4 ár ( all by him selve ) svo að lokum ákveður hann að búa til bát og reyna að sigla sína leið aftur heim til tilvonandi eiginkonu sinnar. Hann lendir í þvílíku veseni og kemur til dæmis upp dramantískur kafli þar sem boltinn hans ( hans eini vinur ) týnist. Á endanum sér stórt skip hann á flekanum sínum og pikkar hann uppí. Svo þegar hann kemur heim eftir langa fjarveru þá er kærasta hans kominn með nýjann mann og búinn að halda áfram sínu lífi. Þetta er þrælgóð mynd með Tom Hanks og mæli ég með þessari mynd fyrir fólk á öllum aldri. TAKK FYRIR !!! :c)

Cast Away er meistaraverk sem tekur á þeim spurningum sem leita á hug mannsins svo oft. Hvar enda ég ef ég fer til hægri frekar en til vinstri? Hvað gerist ef ég fresta því sem ég gæti gert í dag, til morguns? Við lendum svo oft á krossgötum í lífinu, þurfum að taka afdrifaríkar ákvarðanir sem geta breytt öllu okkar lífsmynstri. Þessi mynd veldur því að maður fer að hugsa um þessa hluti og það er vel. Ég naut þess að horfa á myndina og velta söguþræðinum fyrir mér á eftir. Ég er sammála því sem annar "gagnrýnandi" sagði um það þegar tímalínan er rofin á klúðurslegan hátt í miðri myndinni, það var ekkert sniðugt. Ég var samt mikið farinn að spá í það hvernig þeir ætluðu að láta þetta ganga upp öðruvísi. Myndin er góð, vekur upp spurningar í huga manns um lífið og tilveruna. Það eiga góðar myndir stundum að gera. Þrjár stjörnur.

Chuck Noland (Tom Hanks) vinnur fyrir pósthraðsendingarfyrirtæki eitt og er vinnualki af verstu gerð. Hann elskar vinnuna sína en einnig kærustuna sína, Kelly (Helen Hunt) og á oft erfitt með að finna nægilegan tíma fyrir hvort tveggja (Ég er viss um að margir þekkja þetta vandamál nútímamannsins). Þegar hann er í jólaboði hjá fjölskyldu Kelly þarf hann enn einu sinni að þjóta upp í flugvél og afhenda pakka. En flugvélin brotlendir yfir miðju Kyrrahafi og allir farast nema Chuck. Hann rekur upp að óbyggðri eyju langt úr alfaraleið. Hann veit ekkert um það hvernig á að komast af aleinn í náttúrunni og þarf að læra það á erfiða mátann. Og eftir því sem tíminn líður þarf hann að glíma við stærsta vandann: Að missa ekki vitið. Það eina sem hann hefur er mynd af Kelly og vonin um að hann komist einhvern tímann aftur heim. Persónulega finnst mér sagan sjálf heillandi viðfangsefni. Hvað gerir nútímamaður sem lendir í aðstæðum sem ræna hann öllu því sem gerir hann að nútímamanni? Hvernig kemst maður lífs af þegar manni hefur í rauninni verið hent aftur til steinaldar. Ég er í engum vafa um að Robert Zemeckis er hæfileikaríkur leikstjóri og hann og Tom Hanks hafa áttu frábært samstarf með Forrest Gump, bestu mynd þeirra beggja. Handritið er einnig vel skrifað og raunsæislegt að því er ég best veit (þó ég hafi aldrei þurft að hanga einn á eyðieyju) fyrir utan dáldið bældar síðustu 25 mínútur eða svo miðað við það sem á undan hefur gengið. Og Tom Hanks: VÁ!!! Hann sannar hér enn og aftur að hann er með bestu leikurum samtímans og umskiptin sem verða á honum í gegnum myndina eru ótrúleg. Ég veit ekki hvernig þessi mynd hefði orðið hefði hann ekki verið innanborðs. Hann hlýtur að fá tilnefningu til Óskarsins. Helen Hunt er einnig fín í sínu frekar takmarkaða hlutverki. En Hanks er burðarásinn sem heldur myndinni uppi með mögnuðum leik sínum. Og flugslysið: Þetta er í fyrsta sinn í bíómynd sem ég hef verið hræddur í flugslysaatriði. Farið endilega og sjáið þessa mynd. Þótt hún sé ekki gallalaus þá er Tom Hanks og viðfangsefni myndarinnar þess virði til að sjá hana.

Ég held að allir geti verið nokkuð sammála um það að Tom Hanks sé einn allra besti leikari samtímans og ekki klikkar hann í þessari mynd, leikur hans er óaðfinnanlegur. Sömu sögu er að segja um kvikmyndatökuna. Sagan er átakanleg og svo sem góð út af fyrir sig... (maður verður strandaglópur á eyðieyju og bíður þess að verða bjargað en þegar ekkert bólar á björgunarmönnunum þarf hann að taka til sinna eigin ráða) ... En ég varð samt sem áður fyrir miklum vonbrigðum. Myndin hefði allt eins getað verið 90 mínútur í stað 143. Vegna frábærs leiks og listræns útlits gef ég henni ekki minna en ef þú ert þreytt/ur þá skaltu ekki hika við að taka þessa mynd...það er ekkert ólíklegt að þú sofnir.

Stórkostleg ævintýramynd frá óskarsverðlaunaleikstjóranum Robert Zemeckis (Forrest Gump) sem fjallar um þrautseigju og baráttu eins manns við frekar ómannlegar aðstæður. Hér segir af Chuck Noland (Tom Hanks) sem er hamingjusamur en afar upptekinn maður enda starfar hann hjá póstþjónustufyrirtækinu Fed-Ex, þar sem tíminn skiptir öllu máli, og er hann auk þess nýbúinn að trúlofast ástinni í lífi sínu, Kelly Frears (Helen Hunt). En allar framtíðaráætlanir hans taka heldur óvænta stefnu þegar flugvél sem hann er í hrapar yfir miðju Kyrrahafinu og allir farast nema hann. Eftir situr hann aleinn á afskekktri eyðieyju í órafjarlægð frá næstu siðmenningu og það er allsendis óvíst um björgun. Skyndilega er nútímamaðurinn Chuck kominn í framandi umhverfi þar sem hann þarf að heyja í senn bæði erfiða og harðvítuga baráttu til að komast lífs af. En versti óvinur hans er hiklaust einveran, sem getur fengið hvern mann til að ganga af göflunum. Það eina sem hann getur gert er að halda í vonina og missa ekki lífsviljann, þrátt fyrir algjöra óvissu um hvort sá vilji eigi nokkurn tíma eftir að skilaa honum heilu og höldnu heim. Óskarsverðlaunaleikarinn Tom Hanks (Philadelphia, Forrest Gump) fer algjörlega á kostum í hlutverki Chuck Noland og hlaut að launum Golden Globe-verðlaunin sem besti leikari ársins í dramatískri kvikmynd. Einnig hlaut hann einkar verðskuldaða tilnefningu til Óskarsverðlaunanna 2000 sem besti leikari ársins í aðalhlutverki. Þar þurfti hann að sjá á eftir Óskarsstyttunni til Russell Crowe sem reyndar átti stórleik í Gladiator, en mér finnst reyndar að Hanks hefði átt að vinna verðlaunin. Hann átti þau meira skilið. Það hefur eflaust unnið gegn honum að hann vann verðlaunin tvö ár í röð, 1993 og 1994, en mér fannst samt sem áður að hann hefði átt að vinna verðlaunin fyrir þessa mögnuðu frammistöðu sem er hiklaust með hans allra bestu. Hann er einn megnið af myndinni og fer alveg á kostum í þessu hlutverki. Óskarsverðlaunaleikkonan Helen Hunt (As Good As It Gets) er einnig stórfín í hlutverki Kelly Frears, unnustu Chucks. Þrátt fyrir að hún sé ekki lengi á skjánum á hún sterka og góða innkomu í þessu hlutverki. Hanks og Hunt vinna semsagt enn einn leiksigurinn undir traustri leikstjórn Robert Zemeckis sem gerði þessa mynd og spennutryllinn What Lies Beneath samtímis. Ástæðan fyrir því er sú að hætta varð tökum á þessari mynd í nokkra mánuði meðan að Tom Hanks varð að létta sig um rúm 20 kíló og safna skeggi og hári til að geta litið út eins og sannur strandaglópur. Á meðan notaði Zemeckis tímann vel og gerði hina mögnuðu spennumynd og notaði meira að segja sama kvikmyndatökulið og var í þessari mynd. Þetta kallar maður sanna snilld. Cast Away var tilnefnd til 2 óskarsverðlauna 2000; fyrir stórleik Hanks og fyrir besta hljóðið (en það er alveg ótrúlega gott, sérstaklega í atriðinu þegar flugslysið gerist. Það er allt sem gerir þessa mynd góða; handritið er magnað, tónlist Alan Silvestri er alveg stórfengleg (hann gerði líka hina mögnuðu tónlist í Forrest Gump), leikstjórn Zemeckis er afar traust og síðast en ekki síst fara þau Hanks og Hunt alveg á kostum. Þetta er mynd Tom Hanks alveg út í gegn og hann sannar það hér í eitt skipti fyrir öll að hann er einn af allra bestu leikurum samtímans. Semsagt; skotheld kvikmynd sem ég mæli eindregið með fyrir alla sanna kvikmyndaunnendur. Alls ekki missa af þessari!

Tom hanks leikur frábærlega í þessri mynd þegar hann verður strand á eyðieyju eftir flugslys. Flugslyss atriðið er langbesta atriði myndarinnar og hljóðið er alveg frábært í því. Tom Hanks er alveg að verða brjálaður því hann á engan að nema blakboltann Wilson sem er besti vinur hans í rúmlega 400 daga. Þetta er mjög góð mynd þótt hún veri langdregin á köflum en nú segi ég ekki meir.

Myndin fjallar um mann að nafn Chuck Nolan sem vinnur hjá Fedex. mM jólin þarf hann að fara einhvert og skila pökkum. Svo brotlendir vélin og hann festist á eyðieyju. Tom Hanks lék hlutverk sitt mjög fagmannlega en samt sem áður var ekki eins góð frammistaða hjá honum eins og í THE GREEN MILE. Helsti gallinn fannst mér að dramatísku atriðin voru allt of löng. Húmorinn var fínn í þessari mynd. Helen Hunt var fín í sínu hlutverki en flestir aukaleikararnir voru frekar slakir á sér. Fín mynd.

Ég þarf ekki að taka það fram að miklar væntingar voru gerðar til Cast Away. Ýmisleg verðlaun voru orðuð við myndina og var það nokkuð víst að myndin myndi taka þátt í Óskarsverðlaunabaráttunni. Tom Hanks - sem þurfti að þræla og púla fyrir myndina - myndi sýna stórleik og Robert Zemeckis hefði hér með gert sýna fyrstu alvarlegu mynd sem allir yrðu ánægðir með. Ja, ekki alveg... Að vísu sýnir Tom Hanks stórleik, en ég efast um að þessi mynd fái margar tilnefningar þegar að Óskarnum kemur og besta alvarlega mynd Zemeckis er ennþá Contact, þrátt fyrir að ýmsir (heimskir) gagnrýnendur séu á öðru máli. Myndin segir í mjög stuttu máli frá Chuck Noland sem lendir í flugslysi og þarf að búa á eyðieyju í svo og svo langan tíma. Upprunalega hugmyndin var "Robinson Crusoe" í nútímanum og hvernig nútímafólk myndi bregðast við einsemdinni o.s.frv. Hljómar eins og góð hugmynd, og er það upp að vissu marki. Vandinn er einfaldlega sá að erfitt er að enda svona sögu og fáir endar gætu gert myndinni mjög gott, enda sést það. Tveir þriðjuhlutar myndarinnar eru frábærir, byrjunin og miðjan. Myndin kolfellur um sjálfa sig í alveg ótrúlega langdregnum og óáhugaverðum lokahluta, og er það ofsalega mikil synd þar sem ég veit að Zemeckis valdi þennan enda yfir upprunalega endann. Hvernig sem sá endir var þá var hann örugglega ekki mikið verri en þessi týpíski Hollywood endir sem að mínu mati eyðileggur það sem hægt er að eyðileggja í þessari annars stórkostlegu mynd. Zemeckis er algjör snillingur þegar kemur að myndatöku og tæknilegu sviði kvikmyndagerðar og ef einhverjum leiðist sjálf myndin þá er tilvalið að fara í leikin "spot-the-FX", en það er orðið ofsalega gaman að reyna að koma auga á allar "ósýnilegu" tæknibrellurnar hans Zemeckis. En hverjum er ekki sama um brellur? Hvað um sjálfa myndina, þ.e. Tom Hanks. Hvernig stendur hann sig? Hann á skilið öll þau verðlaun sem hann hefur fengið og á eflaust eftir að fá og er alveg frábær í hlutverki sínu. Helen Hunt er einnig mjög góð í þeim fimm mínútum sem hún er með í myndinni og ég ætla ekki einu sinni að tala um aðra leikara þar sem þeir skipta tæknilega engu máli. Hanks á þessa mynd og gerir hana að algjörri upplifun. Það er bara leiðinlegt að myndin skuli ekki hafa getað bjargað sjálfri sér frá svo óáhugaverðum endalokum.

Cast Away má einna best lýsa sem nútímaútgáfu af ævintýrinu um strandaglópinn Robinson Crusoe. Hún segir frá starfsmanni hraðsendingarþjónustunnar FedEx sem lendir í flugslysi yfir Kyrrahafinu þar sem hinir í áhöfninni látast allir og hann kemst einn lífs af. Tom Hanks fer glæsilega með aðalhlutverkið og kæmi ekki á óvart þótt hann bætti enn einni Óskarsverðlaunatilnefningunni í safnið sitt fyrir þetta. Stærsta hluta myndarinnar er hann eina manneskjan sem sést og hefur engan til að tala við nema tilbúinn vin sinn sem hann býr til úr blakbolta. Honum tekst vel að túlka hvernig ýmsar framandi aðstæður hafa áhrif á aðalpersónuna ásamt þeim tolli sem einsemdin tekur á sál hennar. Helen Hunt leikur konuna hans og er mjög góð að vanda þrátt fyrir að vera ekki í mörgum atriðum. Handritið er samt sterkasti þátturinn, hér hefur verið framkvæmt með einstakri kostgæfni að taka gamla hugmynd og setja hana í nútímabúning þannig að hún sé trúanleg sem eitthvað sem gæti í raun og veru gerst. Allar helstu klisjur sem manni dettur í hug þegar maður hugsar út í hugmyndina koma hvergi fyrir og það má í raun segja að myndin sé allt annað en útreiknanleg. Sérstaklega spilar sterkt inn í síðasti fjórðungur myndarinnar sem mér þótti persónulega það áhugaverðasta við myndina og jafnframt það óvæntasta. Eini gallinn og jafnframt eina ástæðan fyrir því að ég gef myndinni ekki fullt hús er hvernig tímalína myndarinnar er slitin sundur um miðbikið á frekar þunglammalegan hátt sem er dálítið erfitt að gleypa við. Cast Away skipar sér í flokk með bestu myndum Robert Zemeckis, Contact og Forrest Gump. Það einkennir þessar myndir að mannlegi þáttur atburðarásarinnar gleymist aldrei og þær takast á við tilvistarlegar spurningar á frekar fíngerðan hátt. Þess þarf varla að geta að hér er allt sem heitir tæknivinnsla að sjálfsögðu með allra besta móti, enda ekki öðru að vænta frá Zemeckis. Frábær mynd sem enginn ætti að láta framhjá sér fara.