Þeir sem heilluðust af hasarleikaranum Iko Uwais í indónesísku slagsmálabombunni The Raid ættu nú að sperra eyrun, því von er á nýrri mynd frá kappanum sem, miðað við fyrstu stikluna úr myndinni, hefur engu gleymt frá því hann lék í The Raid, og slagsmálasenur virðast vera hugvitsamlega blóðugar og vel út færðar.
Myndin heitir Headshot, eða Höfuðskot, og er leikstýrt af Timo Tjahjato og Kimbo Stamboel, en þeir voru báðir viðriðnir myndina Safe Haven, ásamt Gareth Evans leikstjóra The Raid.
Sagan í myndinni er nokkuð kunnugleg. Manni, sem Uwais leikur, skolar á land og man ekki neitt. Sætur og umhyggjusamur læknir tekur hann undir sinn verndarvæng. En fortíðin er drungaleg og hún kemur aftan að honum af fullum krafti. Ekki líður á löngu áður en byssukúlur fara að fljúga og borð og bein að brotna, í sama stíl og við þekkjum úr The Raid myndunum.
Myndin verður frumsýnd á kvikmyndahátíðinni í Toronto í Kanada, TIFF. Með önnur helstu hlutverk fara Sunny Pang, David Hendrawan og Tri Yulismann ( maðurinn með hafnaboltakylfuna úr The Raid 2).
Headshot verður frumsýnd í heimalandinu Indónesíu 16. desember nk. en óvíst er enn með sýningar annarsstaðar.
Kíktu á stikluna hér fyrir neðan, og plakatið þar fyrir neðan:
