Gamanmyndahátíð Flateyrar var haldin um helgina, við góðar undirtektir fjölda gesta, en alls mættu allt í allt rúmlega 300 gestir á viðburði hátíðarinnar, en íbúafjöldi Flateyrar er innan við 200 manns.
Aðstandendur hátíðarinnar ásamt Ágústi og Gísla. Frá vinstri: Ársæll Níelsson, Gísli Halldór Halldórsson, Ágúst Guðmundsson og Eyþór Jóvinsson
Í tilkynningu frá hátíðarhöldurum segir að húsfyllir hafi verið í samkomuhúsinu þegar ný sing-along útgáfa af Stuðmannamyndinni Með allt á hreinu hafi verið heimsfrumsýnd. „Gríðalega góður rómur var gerður af sýningunni, stanslaust sungið og mikið hlegið. Fyrir sýninguna tók Ágúst Guðmundsson, leikstjóri myndarinnar á móti viðurkenningu úr höndum Gísla Halldóri Halldórssyni bæjastjóra Ísafjarðarbæjar. Var Ágúst heiðraður fyrir framlag sitt til íslenskra gamanmyndagerðar,“ segir í tilkynningunni.
Verðlaunahafar hátíðarinnar: Frá vinstri: Hálfdán Pedersen, aðstandandi Landsliðsins, Emil Alfreð Emilsson, Leikstjóri Aukahlutverk og Jón Bjarki Hjálmarsson, Afi Mannsi.
Á hátíðinni fór fram áhorfendakosning, þar sem kosið var um fyndnustu mynd hátíðarinnar. Heimildamyndin Landsliðið eftir Hafstein Gunnar Sigurðsson varð hlutskörpust, en hún fjallar um tvö pör og sálfræðing sem skrá sig til leiks í einni virtustu snjóhöggskeppni heims, þrátt fyrir að hafa aldrei gert ísskúlptúr áður.
Tvær myndir fylgdu fast á hæla Landsliðsins og fengu verðlaunin, Næstum því fyndnust. Þar var einnig um heimildarmyndir að ræða; Afi Mannsi og Aukaleikarar, en þær fjalla báðar um afa og ömmu leikstjórana. Jón Bjarki Hjálmarsson leikstýrði myndinni Afi Mannsi, en Emil Alfreð Emilsson myndinni Aukaleikarar.