Kung: Skull Island leikarinn Tom Hiddleston hlaut nú á dögunum verðlaunin Rear of the Year, eða Afturendi ársins, en það er vefsíða Entertaiment Weekly sem greinir frá þessu.
Hiddleston, sem er 35 ára, fékk viðurkenninguna fyrir nektaratriði sitt í stuttseríunni The Night Manager, þar sem hann leikur á móti Hugh Laurie og Elizabeth Debicki.
Vinningshafar síðustu ára eru sjálfur Harry Potter, Daniel Radcliffe, árið 2015, og söngvarinn Olly Murs, árið 2014.
Til að hlotnast þessi heiður þá þurfa sigurvegararnir að vera breskir, og samkvæmt vefsíðu verðlaunanna, að búa yfir „verðlaunarassi“.
Kvenkyns sigurvegari þessa árs er hin 33 ára gamla leikkona Jennifer Metcalfe.
Senan sem um ræðir var sýnd í þáttunum í Bretlandi, en var klippt burt þegar þættirnir voru sýndir í Bandaríkjunum. „Ég var undrandi að heyra að þeir hafi klippt afturendann burt,“ sagði hann við W tímaritið. „Ég segi bara hér og nú að rassinn á mér er ekki hættulegur. Og það er margt mun hættulegra sem sést í sjónvarpi í dag.“