Handritið að Star Wars: Episode VII er tilbúið að sögn leikstjórans J.J. Abrams. Þetta staðfesti hann á ráðstefnu sjónvarpsgagnrýnenda á dögunum.
„Við vinnum hörðum höndum í undirbúningi fyrir kvikmyndina og erum með tilbúið handrit.“ sagði J.J. Abrams og bætti hann svo við að þær sögusagnir um að hann sé í viðræðum við Breaking Bad-leikarann Jesse Plemons séu sannar.
„Hann er einn af þeim leikurum sem við höfum talað við, en það gerist ekki oft að ég lesi réttar sögusagnir og það er fyndið að segja frá því að ég las að við værum í viðræðum rétt áður en ég hitti hann.“
Leikstjórinn var einnig spurður að því hvort hann ætlaði að nota stafræna tækni eða filmu til þess að skjóta nýju myndina. J.J Abrams svaraði því eins og fyrri daginn að hann er staðfastur á því að skjóta á filmu.