Clint Eastwood hefur verið ráðinn til að leikstýra mynd sem ekki hefur enn fengið nafn, um líf flugstjórans Chesley „Sully“ Sullenberger, sem varð hetja eftir að honum tókst að lenda farþegaþotu á Hudson ánni í New York, og bjarga þar með lífi allra farþeganna.
Todd Komarnicki skrifar handritið og byggir það á bókinni Highest Duty: My Search for What Really Matters eftir Sullenberger sjálfan og Jeffrey Zaslow.
Greg Silverman yfirmaður hjá Warner Bros sagði í tilkynningu að Eastwood væri á hátindi ferils síns, og löngu orðinn alþjóðleg gersemi. „Strax á eftir því sem hann gerði í American Sniper þá er ótrúlega spennandi að sjá hann takast á við líf annarrar hetju.“