Ártún vann Gullna Skjöldinn

Ártún, stuttmynd undir leikstjórn Guðmundar Arnars Guðmundssonar, hefur verið valin besta leikna stuttmyndin á alþjóðlegu kvikmyndahátíðinni í Chicago og hlaut að launum verðlaunagripinn Gullna Skjöldinn (e. the Gold Plaque). Þetta kemur fram í fréttatilkynningu frá Kvikmyndamiðstöð Íslands.

Ártún hefur þegar verið boðið til þátttöku á fjölda erlendra kvikmyndahátíða, en þetta er fyrsta keppnishátíðin sem myndin tekur þátt í. Næst á dagskrá fyrir Ártún eru t.d. þátttökur á Zagreb kvikmyndahátíðinni í Króatíu, Norrænum kvikmyndadögum í Lübeck í Þýskalandi, Norrænni kvikmyndahátíð í Leeuwarden í Hollandi og á evrópsku stuttmyndahátíðinni í Brest í Frakklandi.

artun

Þess má geta að önnur stuttmynd eftir Guðmund Arnar, Hvalfjörður, hlaut verðlaun á Chicago hátíðinni í fyrra, en þá hlaut Hvalfjörður sérstök dómnefndarverðlaun.

Guðmundur Arnar Guðmundsson leikstýrir og skrifar handritið að Ártúni en myndin er framleidd af Antoni Mána Svanssyni fyrir Join Motion Pictures í samstarfi við Sagafilm og hið danska Fourhands Film. Aðalhlutverk myndarinnar eru í höndum ungmenna sem eru að stíga sín fyrstu skref í leiklistinni: Flóki Haraldsson, Viktor Leó Gíslason, Daníel Óskar Jóhannesson, Jónína Þórdís Karlsdóttir og Heiða Ósk Ólafsdóttir.

Á hátíðinni, sem fagnaði 50 ára afmæli sínu í ár, voru samtals sjö íslenskar kvikmyndir sýndar sem hluti af sérstökum norrænum fókus hátíðarinnar. Ásamt Ártúni voru íslensku myndirnar sem voru sýndar á hátíðinni leiknu kvikmyndirnar París norðursins, Hross í oss, Djúpið og 101 Reykjavík, heimildamyndin Vive la France og stuttmyndin Milk and Blood. París norðursins tók þátt í New Directors keppninni, Vive la France var hluti af Docufest keppninni og Milk and Blood tók þátt, líkt og Ártún, í aðalkeppni stuttmynda.